A reforma eléctrica, xa acometida, inclúe instalación de luminarias led e tamén se reformarán a cuberta e a pista de xogo

A alcaldesa de Mos, Nidia Arévalo; o concelleiro de Deportes, José Areal; e o edil mosense de Servizos, Baldomero Lorenzo; visitaron onte o Pavillón de Sanguiñeda, onde o Concello de Mos está a acometer obras de mellora integral.

Os traballos consisten, no tocante á instalación eléctrica, na substitución das luminarias por focos led, que optimizan a iluminación e a eficiencia enerxética por implicar unha reducción do consumo eléctrico e na instalación dun novo cadro eléctrico. Esta parte tocante a iluminación e electricidade require dun investimento de 8.300 €.

A mellora integral da instalación deportiva inclúe tamén a reparación da cuberta cun orzamento aproximado de 41.700 €. Por último optimizarase a pista de xogo con mellora do firme e pintado, valorado nuns 20.000 €.

O orzamento total desta mellora chega aos 70.000 €, destacando os representantes municipais que “a mellora das infraestruturas deportivas municipais co obxectivo do fomento do deporte no ámbito municipal, forma parte das prioridades da xestión do equipo de goberno local”.

“Esta mellora integral ten o obxectivo de potenciar o deporte base, sendo conscientes da importancia das obras que beneficien ao conxunto dos cidadáns para a práctica deportiva. Trátase dunha importante actuación de interese público, ao tratarnos o Concello de Mos dun municipio que aposta forte polo deporte en xeral e polo deporte base en particular. Ademais este pavillón dá servizo ao CEIP Mestre Valverde Mayo de Sanguiñeda”, explicaron os representantes municipais.