Nin sequera despois do seu pasamento pode descansar en paz xa que os ´trolls’, neste caso do colectivo negacionista, empregan a súa imaxe para tentar facer crer que o infarto que padeceu ten que ver coas dosis da vacina

O PSdeG-PSOE da provincia de Pontevedra denunciou a unha trintena de contas de Twitter por utilizar o falecemento da que foi alcaldesa do Porriño, Eva García de la Torre, para difundir propaganda antivacinas e negacionismo da pandemia. O secretario xeral provincial, David Regades, manifesta estar “consternado” pola aparición deste tipo de mensaxes e esixe  respecto por unha muller que, en coherencia coa súa vida persoal e política, foi unha activa defensora da  vacinación e de tódalas medidas para loitar contra a pandemia de covid-19.

Os tuits publicados vinculan, na súa meirande parte, a vacinación de Eva García de la Torre co seu falecemento a causa dun infarto, sen achegar ningún dato ou evidencia máis alá dos tics habituais dos perfís negacionistas. As mensaxes son semellantes ás que este colectivo troll difunde en relación cos falecementos doutras persoas con proxección pública. O hashtag #Repetintinis identifica a boa parte destas publicacións na rede social.

Un deses tuits mesmo estaba publicado en francés. O Partido Socialista na provincia e o seu secretario xeral anuncian que seguirán denunciando cantas publicacións se fagan neste senso, e invita a unha profunda reflexión social sobre a insensibilidade e crueldade gratuíta deste tipo de persoaxes, que campan ás súas anchas polas redes sociais.