O artista madrileño foi elixido polo xurado composto polo gañador da pasada edición -‘O Ras’- e polos artistas PowOne e Sax

A Concellería de Festas e a Oficina Municipal de Información Xuvenil -OMIX do Porriño- organizaron a segunda edición do concurso “Improvisdado, Batalla de Debuxantes”, incluído na programación das Festas do Cristo.

A final tivo lugar na tarde do sábado, nun escenario preparado pola produtora do evento, “Vella Escola”, que preparou un escenario no Parque do Cristo onde os seis finalistas tiveron que improvisar un deseño artístico cos utensilios proporcionados.

A concelleira de Festexos do Porriño, Cami Moreira, realizou a entrega de agasallos e trofeos aos seis finalistas desta segunda edición, que concluíu coa vitoria do artista madrileño,  ‘Makinoteka’, por decisión do xurado do certame formado por “O Ras” -gañador do concurso en 2020- e os artistas PowOne e Sax.

A segunda posición foi para ‘Sedo’, de Vigo e o terceiro posto para ‘Dusem’, de Ourense. Os tres finalistas restantes do concurso foron ‘Tremze’, de Francia; Tamara Baz, de A Guarda; e ‘BTO’, de Madrid.