Dende a Alcaldía firmouse hoxe a orde de pago aos 45 beneficiarios desta primeira quenda de axudas para a hostalería, comercio e autónomos

A alcaldesa Eva García firmou este mediodía, por sede electrónica, as ordes de pagamento aos  primeiros beneficiarios do lote de axudas económicas directas recoñecidas polo Concello do Porriño, neste ano 2021, a establecementos de hostalería, comercio e autónomos -que as solicitaron- polo impacto dos peches derivados da pandemia.

Nesta primeira quenda, adxudicáronse axudas por un total de 60.926 € a 45 beneficiarios. Destas axudas, 30 por peche total da actividade por un importe de 42.926 €, e 15 por cese parcial da actividade, por un valor global de 18.000 €.

O destino destas axudas, segundo as solicitudes presentadas, é para pagar alugueres, hipotecas, seguros, mercadorías, subministros e gastos xerais.

Denegáronse 20 solicitudes de axudas, que xa foron notificadas aos interesados para que resolvan as deficiencias e volvan a presentarse.

Nas vindeiras semanas, haberá unha reunión do tribunal de avaliación, para outorgar novas axudas con cargo ao fondo total de 140.000 € acordados no Pleno da Corporación Municipal do Porriño.