A ciclista campioa do Louriña Cycling Team e a porriñesa e subcampioa Chus Barros do C.C. Spol, fixeron cronos cunha diferencia 1′ 33” segundos na proba disputada en Baños de Molgas

Ana Mª González Cuña igualmente ciclista porriñesa, tamén subiu ao pódium no 3º posto da categoría Sub 40

 

 

O Campionato Galego Contra Reloxo disputábase sobre un circuíto de 13 km, na vila termal de Baños de Molgas, con saída e meta no Santuario dos Milagres.

A triatleta Aida Valiño, flamante fichaxe do novo equipo ciclista porriñés Louriña Cycling Team -produto da fusión entre Máster da Louriña e A.D. Avanza- proclamouse campioa galega de contra reloxo individual 2020, na categoría elite.

Cun crono de 19:36, Aida amosou a súa calidade, pois “hai que ter en conta que reincorporouse  á competición,  despois de estar alonxada do ciclismo nestes últimos anos, tras da súa maternidade e de sufrir dous accidentes de tráfico cando adestraba.

Na mesma categoría, a porriñesa “Chus” Barros, do C.C. Spol foi subcampioa de Galicia cun tempo de 21:09.

No que atinxe á categoría elite masculina, o ciclista Roberto Mediero, do LouriñaCyclingTeam, foi medalla de bronce, a 1:13 do gañador, Samuel Blanco. Por outra banda o seu compañeiro de equipo, Gustavo Rodríguez, que partía como favorito ao título, rematou cuarto a consecuencia dun pinchado que rebaixou as súas posibilidades.

Na categoría cadete masculino, Roberto Pereira da A.D. Avanza, foi 3º cun crono de 21:00, a 19″ do gañador.

Finalmente, en categoría Máster 40 masculina, Carlos Iván Vidal de Sa do Louriña Cycling Team, foi medalla de prata; e na categoría Máster 40 feminina, a tamén porriñesa Ana Mª González Cuña do Mitto X-Sauce Berria, que foi bronce.