“O triste é que as declaracións de Alejandro Lorenzo demostran a súa ignorancia e xa sabemos que a ignorancia é atrevida” resume Eva García

Despois da derradeira comunicación do PP do Porriño, a resposta da alcaldesa socialista non tardou en chegar, calificando esta actitude contra a súa persoa como  “acoso, polo que sexa e con calquera argumento e cun único obxectivo: ensuciala”, dixo Eva García de la Torre en resposta á denuncia por parte do PP local de que a rexidora interferise na última licitación do contrato de limpeza.

A este respecto, a alcaldesa do Porriño respondeu que se trata “unha vez máis dunha falsa acusación, sostendo que pretendo influír no procedemento de licitación do contrato de lixo a favor dunha empresa, que é absolutamente falso e que o saben.O triste é que as declaracións de Alejandro Lorenzo demostran a súa ignorancia e xa sabemos que a ignorancia é atrevida”.

Eva García argumentou que “quen admite o recurso contra a adxudicación é o Xulgado de Contratación de Galicia (TACGAL) e, en segundo lugar, unha vez admitido a trámite o recurso, o TACGAL require o servizo que tramita o contrato, o expediente con informe, que é o que fixo este concello. O que se fixo desde este goberno municipal foi apoiar a decisión da mesa de contratación e do Pleno da Corporación, de adxudicar o servizo á empresa mellor valorada”.

García concluíu que “as declaracións do señor Lorenzo amosan o seu descoñecemento e, lonxe de prexudicar a esta alcaldesa, desprestixian política e persoalmente ao xefe da oposición”. O Pleno da corporación municipal porriñesa adxudicou en xuño o devandito contrato á empresa ‘Servicios dos Concellos Galegos’, segundo a valoración feita pola Mesa de Contratación e despois da renuncia da primeira empresa valorada, ‘Valoriza’. Outra das empresas que concorreu ao concurso foi ‘Ascan’, que é quen presentou o recurso que está a atender o Tribunal de Contratación de Galicia.