O deputado Luís Bará e a alcaldesa de Ponteareas, Cristina Fernández, participaron no acto de presentación da lista celebrado na Sala Rebullón das Pedriñas.
Gustavo Barcia: “este equipo destaca polo seu inquebrantable compromiso cun proxecto que aspira a mellorar a calidade de vida da nosa veciñanza”.
Mellorar os servizos públicos, dar resposta á crecente demanda de vivenda ou ofrecer un trato equitativo a toda a veciñanza son algunhas das claves do proxecto
O candidato do BNG á alcaldía de Mos, Gustavo Barcia, xa desvelou o nome de todas as persoas que conforman a súa lista para as eleccións municipais. Un equipo, en palabras de Barcia, “preparado para gobernar e darlle un novo rumbo ao concello de Mos”. Realizou estas declaración no acto oficial de presentación da candidatura, celebrado na Sala
Rebullón das Pedriñas e no que participaron tamén o deputado no Parlamento Galego Luís Bará e a alcaldesa de Ponteareas, Cristina Fernández. Na súa intervención, o actual portavoz nacionalista na corporación municipal expresou a súa vontade de “recuperar o Concello, non para o BNG senón para a xente” despois do 28 de maio. Aspira a “acadar o apoio maioritario da veciñanza” cunha lista paritaria na que figuran moitas caras novas xunto a persoas que xa
asumiron responsabilidades de goberno en mandatos anteriores.
Gustavo Barcia presentou ás 25 persoas que conforman a lista como “un equipo que destaca non só por ter un gran currículo, senón polo seu inquebrantable compromiso cun proxecto que aspira a mellorar a calidade de vida da veciñanza”. A lista está conformada por xente procedente de ámbitos profesionais diversos, dos movementos sociais e do tecido asociativo das distintas parroquias de Mos. Son persoas, segundo o candidato á alcaldía, que se
caracterizan “por ter esa ilusión que fai mudar o mundo, por combater a intolerancia e a inxustiza alí onde se produzan e por non renderse nunca”.
“Proxecto pensado por e para a xente”
O acto de presentación da candidatura serviu tamén para adiantar as principais liñas do programa de goberno do BNG de Mos para o mandato 2023-2027. Barcia explicou que se trata dun “proxecto pensado por e para a xente”, con propostas que son produto dos encontros abertos celebrados coa veciñanza de todas as parroquias e das reunións mantidas con asociacións veciñais, culturais, deportivas e sectoriais durante os últimos meses. O candidato á alcaldía
comprometeuse a traballar para mellorar os servizos públicos, protexer os sectores máis vulnerables da poboación e dar resposta ás demandas de vivenda e emprego de calidade para a mocidade de Mos. Defendeu, ademais, a necesidade de ofrecer un trato equitativo a todos os colectivos sociais e veciñais, “desterrando para sempre o caciquismo e os especuladores do Concello”. Concluíu reivindicando que “basta xa de fotos e propaganda barata, o orgullo de ser de Mos ten que ser por ter bos servizos e calidade de vida”.
Candidatura do BNG de Mos para as eleccións municipais de 2023
- Gustavo Barcia Seijo
- Sara Samartín Rodríguez
- Alberto Barreiro Ricón
- Esther Rúas Miguélez
- Carlos Villar Gutiérrez “Cao”
- Sara Lorenzo Costas
- Paco García Cobas
- Ana Bar Rodríguez
- David Otero Blanco “Pelu”
- Lia Aldea Moreira
- Oscar Rodríguez Campo
- Isabel Ramilo Rivero
- Diego Lago Alonso
- Mirian Cabaleiro Montes
- Pablo Novoa Bar
- Mari Carme Vila Blanco
- Miguel Aldea Moscoso
SUPLENTES - Fernando Gomes dos Santos
- Tania Jorge Santos
- Ramón Barcia Seijo
- Marta Moreira Fontán
- Diego López Pazo
- Lucia Samartín Rodriguez
- Cristina Represas Romero
- Xosé Carlos Cabaleiro Romero “Pescador”