Os socialistas mosenses acusan a alcaldesa, Nidia Arévalo, de enganar a veciñanza cando fala da transparencia dos orzamentos

Durante a pasada semana, o  Concello de Mos afirmou ter perfilados os seus orzamentos de cara o ano 2023. Previsións que deben trasladar aos partidos da oposición, para levalos a unha comisión e posteriormente ao Pleno; feito que denuncia o PSdeG-PSOE de Mos indicando que  “non se produciu”.

“Nos pasados días, a prensa facíase eco dunha noticia do Concello no que anunciaban ter os orzamentos e facernos entrega dos mesmos aos grupos da oposición” explica a concelleira socialista Victoria Alonso, afirmando que tal cousa “non se chegou a producir, xa que non recibimos tal información; outra mostra da facilidade que ten a actual alcaldesa para enganar e ocultar a verdade aos veciños”.

Victoria Alonso, incide no feito de que “temos que recibir a documentación no tempo que estipula a lei, a alcaldesa non pode decir o que non é” subliñando que “a falla de transparencia e información é habitual na xestión do PP, levamos anos denunciando”. Remata a concelleira da oposición engadindo “non imos permitir que se diga na prensa que xa recibimos a documentación cando, días despois das afirmacións, seguimos sin tela”.