As vindeiras dúas eliminatorias do xogo celebraranse o 24 e 25 no pavillón  do colexio Fernández López

A Concellería de Festexos informa que, debido á previsión meteorolóxica, decidíu cambiar o lugar onde se celebrarán as dúas próximas quendas de clasificación do xogo “TriviumPorriño”, previstas para o venres 24 e o sábado 25.

Terán lugar no pavillón  do colexio “Fernández López”, onde se instalará o escenario para o desenvolvemento das dúas probas.

Haberá público con aforo limitado e mantense a hora prevista, a partir das 18.00 h os dous días.

As dúas primeiras quendas celebráronse a fin de semana pasada no Parque do Cristo.

“TriviumPorriño” é  un xogo similar ao “Trivial” pero personalizado na nosa vila, para por a proba o grao de coñecemento que os participantes teñen sobre O Porriño. Preparáronse 1.500 preguntas sobre o municipio relativas á historia, xeografía, ciencia e natureza, arte e literatura, deportes e entretemento.