Trátase do fin de proxecto interdisciplinar anual do centro que acolle traballos dos alumnos e un maratón radiofónico que terá lugar mañá martes no Pavillón de Leirado

O martes, 22 de xuño, de 11:00 h a 13:00 h. no camiño do pavillón de Leirado, como peche das actividades lectivas no CEIP Leirado, haberá un maratón radiofónico e unha exposición dos traballos que realizou o alumnado ao longo do curso en relación co proxecto interdisciplinar “A tope coa saúde”.

Para dar cumprimento ao protocolo COVID, este curso, o alumnado non poderá ser o protagonista da explicación do proxecto anual de centro “A tope coa saúde” e será parte do profesorado do centro que nos acompañe durante a visita e maratón radiofónico.

Neste proxecto fixemos traballos de investigación (microorganismos, vacinas, historia da medicina, pandemias históricas…), aprendemos a ser saudables (prevención de enfermidades e accidentes, descanso, exercicio físico, alimentación) e agora amosamos todo o que aprendemos. Desenvolvéronse tarefas integradas en todos os niveis empregando a aprendizaxe cooperativa que culminaron con esta exposición e maratón radiofónico (produto final das tarefas integradas do 3º trimestre).

A Comunidade Educativa do CEIP de Leirado agarda a vosa asistencia en horario de 11:00 a 13:00 h.