Estímase que un 16% das mulleres adultas viven coa enfermidade do lipedema, enfermidade pouco coñecida que adoita a diagnosticarse erroneamente como obesidade.
O mes de xuño é o mes dedicado ao lipedema, enfermidade recoñecida pola OMS dende a data do 8 de maio do 2018 e incluída no catálogo ICD-11que clasifica internacionalmente as enfermidades baixo o código EF02.2 “Alteracións non inflamatorias da graxa subcutánea”. Esta patoloxía afecta ao 16% da poboación feminina mundial, pero tamén a homes e calcúlase que mundialmente 616.000.000 persoas viven con esta doenza completamente descoñecida, non rara, pero si infradiagnosticada e infratratada pola Sanidade.
Non se coñece a orixe do lipedema, é unha enfermidade crónica, hoxe en día non existe cura e confúndese coa obesidade porque os seus síntomas principais son o engrosamento de brazos e pernas e ten un compoñente hormonal. O lipedema produce dores constantes e incapacitantes, estreitamento dos vasos capilares e danos linfáticos. Nos casos avanzados, afecta gravemente á mobilidade impedindo camiñar e valerse por si mesmo.
Debido á falta de investigación, só dispón de caros tratamentos conservadores e cirurxía en clínicas privadas. Ao ser unha patoloxía invisibilizada para o noso sistema de Saúde é moi difícil contar cun diagnóstico médico e, polo tanto, sen un tratamento conservador, medra o empeoramento grave.
Dende a Asociación Galega de Linfedema e Lipedema (AGL), entidade membro de COGAMI, lanzan a campaña Non Somos Invisibles: védesnos pola rúa, na praia, con pernas e/ou brazos desproporcionados co resto do corpo, cintura estreita… A xente non sabe que é lipedema, chámalle gordura, obesidade, pereza, falla de forza de vontade ou, directamente, sinalan, rin e mófanse coa expresión `pernas de elefante´.
Dende AGL quérese facer especial fincapé nesta doenza porque cada vez afecta a máis mulleres, por iso traslada as reivindicacións de moitas mulleres que sofren en silencio a discriminación no acceso ao servizos públicos.
Durante este ano, esta entidade incorpora ao programa de fisioterapia especializada que desenvolve en diferentes puntos de Galicia a atención do linfedema e lipedema, contando arestora con 70 persoas usuarias no servizo, un tratamento imprescindible na maioría das ocasións para as persoas que teñen esta doenza. Este programa desenvólvese coa colaboración da Fundación ONCE cunha aportación de 22.000€ a través do Plan de Prioridades 2020.
Datos de contacto AGL:
Asociación Galega de Linfedema, Lipedema, Insuficiencia Venosa Crónica e outras patoloxías vasculares periféricas (AGL).
Teléfono 986 505 443 / 630 024 428
Email: info@linfedemagalicia.com
Persoa de contacto: Juan Manuel Lameiro Barreiro (presidente) / María Araujo Rey (traballadora social)