Segundo sinalan os nacionalistas, o proceso acumula 15 anos de demora, con Nidia Arévalo no poder, dende a convocatoria dun concurso público en 2005 polo anterior goberno de coalición do PSdeG e BNG. A alcaldesa aínda non aclarou se vai respectar o acordo para construír a casa consistorial nas Pozas, tal como prevé o PXOM aprobado en 2017.

 

O BNG de Mos pronúnciase sobre o anuncio realizado pola alcaldesa a mediados de decembro en relación a construción dunha nova casa consistorial. Para os nacionalistas, tal proxecto “debería ser ilusionante” e “unir a toda a veciñanza”, mais observan “máis dúbidas que certezas” en relación a este asunto. 

Nidia Arévalo adiantou a convocatoria dun concurso de ideas e as redes sociais do Concello divulgaron o suposto compromiso do presidente da Xunta para a asignación dunha partida orzamentaria. O BNG coñeceu a iniciativa a través da prensa e, a día de hoxe, o goberno municipal aínda non ofreceu máis información sobre un proxecto que debería contar co respaldo de todas as forzas políticas. O portavoz nacionalista, Gustavo Barcia, entende que o secretismo en torno á nova casa do Concello “é unha mostra máis do sectarismo que caracteriza ao PP de Mos”.

O anuncio de Nidia Arévalo chega con 15 anos de demora dende a convocatoria dun concurso público en 2005, tal como sinala Barcia. Naquel momento a corporación municipal que presidía María Xesús Escudero (PSdeG) xunto co BNG acordara, co voto faborábel do PP, a construción dunha nova casa consistorial nas Pozas e así quedou recollido no PXOM. O BNG defende a necesidade de retomar ese proxecto e adaptalo á normativa actual, algo que suporía, segundo Barcia, “un enorme aforro de tempo e diñeiro”.

O goberno bipartito reservara daquela dous millóns de euros para a nova sede do concello e negociara coa Xunta a construción de vivendas de promoción pública co obxectivo de crear un núcleo urbano no que estivesen centralizados todos os servizos. Barcia lamenta que os plans de futuro de Mos “quedaran desbaratados trala chegada de Nidia Arévalo ao poder, de forma fraudulenta, coa axuda dun tránsfuga”.

“Máis alá das fotos e as mensaxes propagandísticas, a opacidade en torno ao proxecto é máxima”, denuncia o BNG. A directiva da Comunidade de Montes da parroquia de Mos pretende ofrecer uns terreos na contorna do Pazo para a nova casa consistorial, pero o PP aínda non aclarou cales son as súas intencións. O BNG xa anunciou a súa oposición ao traslado da capital municipal, ao entender que a construción dun edificio administrativo suporía unha degradación do núcleo histórico da Rúa, alén de ir en contra do propio ordenamento urbanístico aprobado polo goberno de Nidia Arévalo hai menos de catro anos. Por outra parte, Gustavo Barcia entende que “toda a veciñanza debería ser partícipe dunha decisión deste calado”.