Roi Casal actuará mañá no Teatro Municipal co seu concerto “As músicas do Camiño”
O espectáculo estaba programado inicialmente na rúa pero foi trasladado ante a previsión de choiva
O aforo limítase a 150 persoas
O músico Roi Casal presentará mañá domingo, 16 de agosto, en Tui o seu espectáculo musical “As músicas do Camiño”. Será ás 22 h no Teatro Municipal, xa que debido as previsións de choivas foi cambiado o emprazamento dende a rúa Compostela, onde esta inicialmente programado, ao teatro tudense. Debido a isto o aforo limitase a 150 persoas. A reserva de entradas segue aberta até mañá domingo, ás 12, ou até que esgoten as prazas dispoñibles, en enterticket.es
Roi Casal fará un repaso a boa parte da súa discografía facendo un compendio da música do seu camiño dende o primeiro albume “Lendas douradas”, pasando por “Maxicamente Vello” e “Donos do noso destino” até o último “Son Galego, son Cubano”. Durante a hora e media do concerto pasará por distintos ambientes musicais, dende uns onde arpa e a zanfoña teñen moita presenza, até outros cun carácter pop máis marcado.
A entrada ao concerto no Teatro Municipal poderá realizar dende 45 minutos antes do concerto seguindo o protocolo COVID establecido, que inclúe a limitación de aforo, sinalización de entradas e saídas, desinfección con xel hidroalcohólico, uso obrigatorio de máscara ao longo de todo o espectáculo.
Este concerto forma parte da programación cultural “Volvemos á Rúa” organizada polo Concello de Tui e chega a Tui ao abeiro do programa Musigal da Deputación de Pontevedra.