![](https://porrinodigital.es/wp-content/uploads/2018/12/images_00018Diciembre_VictoriaAlonsoPSOEMos.jpg)
Tras coñecerse o pasado mes a emisión dun novo informe oficial desfavorábel, perceptivo e vincultante, sobre o macroproxecto do Celta e do goberno de Nidia Arévalo no Concello de Mos, a agrupación socialista local mobilízase para exixir a retirada da modificación do plan urbanístico.
A bancada socialista, apoiándose nos informes desfavorables de Fomento, a Confederación Hidrográfica Miño-Sil, Deputación de Pontevedra e AENA, solicita ao goberno local a retirada da modificación puntual do PXOM que suporía cambiar a catalogación dos terreos forestais protexidos para usos dotacionais e terciarios, no marco do proxecto urbanísitco do Celta. Os socialistas argumentan que un proxecto con deficiencias coma as que salientan estas administracións non pode levarse a cabo.
Segundo os socialistas mosenses, Fomento resalta que o proxecto implica alteracións no servizo e seguridade nas estradas estatais afectadas, o estudo de tráfico non está xustificado e desaconsellan a aplicación de novos accesos no tramo de concentración de accidentes. A Confederación Hidrográfica Miño-Sil emitiu un informe desfavorábel no tocante á dispoñibilidade xurídica da auga para o proxecto e cuestións relativas a augas pluviais e a non existencia dunha reserva de auga. AENA tampouco emitiu un informe favorable, xa que este queda condicionado a inclusión no proxecto de aspectos que impliquen as subsanacións indicadas. Ademais, súmase o informe desfavorábel emitido pola Deputación de Pontevedra, posto que entenden o proxecto coma un documento falto de concreción e con erros, onde non se ten en conta a orográfica dos terreos para a realización da estrada alternativa a provincial e non resolve o problema do incremento de tráfico que xerarán os novos usos previstos.
A voceira socialista, Victoria Alonso, di que un proxecto con estas deficiencias e con estes informes perceptivos e vinculantes desfavorábeis non ten razón de ser. Sumándose ás peticións dos veciños e dos comuneiros de Tameiga, sinala que a retirada deste proxecto resulta máis imprescindíbel con esta nova información. Móstrase partidaria de que o Concello de Mos adopte un postura máis intelixente e escoite aos técnicos que aluden os problemas relativos á accesibilidade, auga, medioambiente e cuestións sociais.
Alonso quere recordarlle á rexedora local que máis da metade dos votos da veciñanza mosense non apoiou este proxecto. Tamén engade que a mellora da situación económica do Concello pasa por facer unha boa xestión e traballar para que o concello medre, e non atendendo aos intereses económicos dun empresario concreto.