A alcaldesa entregou ao colexio as chaves do inmoble da planta alta do centro, que levaba 25 anos ocupada por unha persoa e que trala xestión da rexidora deixa valeira a vivenda

 

 

A alcaldesa do Porriño, Eva García de la Torre, acompañada da concelleira de Educación, Lourdes Moure, fixo entrega ao director do CEIP Plurilingüe de Atios das chaves da vivenda de 90 metros cadrados, que ocupa a planta alta do centro que, dende agora, pode ser utilizada polo mesmo, tal e coma demandaba a Asociación de Nais e Pais (ANPA).

Logo de manter varias conversas coa persoa que vivía nela e coa familia desta, a alcaldesa conqueriu que a primeiros deste ano a vivenda quedase valeira, preto dun cuarto de século despois da súa ocupación.

Hai que lembrar que a inquilina era unha refuxiada de Bosnia que, dende 1994, vivía nesta casa que lle fora cedida polo desaparecido José Manuel Barros -daquela alcalde do Porriño- para que esta muller, que lograra fuxir da terrible guerra que asolara os Balcáns, puidese comezar unha nova vida no Porriño, coa súa familia.

Durante estes preto de 25 anos, o Concello do Porriño fíxose cargo de todos os gastos de suministro de auga e de electricidade desta casa, como sinala Eva García de la Torre. Ao pouco tempo de tomar posesión da Alcaldía, xa anunciara a súa intención de recuperar a mesma para o CEIP de Atios que, coma lle expuxeran os representantes do ANPA, precisaba dispoñer deste espazo, logo de que en estes anos multiplicase máis que por dous, o seu número de alumn@s.

Eva García de la Torre agarda que, “agora sí” o Goberno de Galicia “que é quen ten as competencias, en exclusiva, en Educación” cumpra coa súa obriga e, de verdade “asuma o custo de reforma de este novo espazo” co que conta o Colexio de Atios e “realice, por fin, as obras que permitirían contar con dúas novas aulas no mesmo, tal e como demandan as nais, os país e o seu director”.