O Concello habilitará un espazo adicado a informar á veciñanza sobre a actualización de parcelas en colaboración co Catastro e o ORAL

A partir do luns 19, o Concello do Porriño habilitará un espazo de información á veciñanza no salón de plenos para aclarar as dúbidas e consultas sobre a actualización da calificación das parcelas, realizada pola Xerencia Territorial do Catastro en aplicación da lexislación vixente de ámbito estatal. 

O punto de información será atendido por funcionarios da Xerencia Territorial do Catastro e do Organismo de Recadación de Administración Local -ORAL-, he prestará atención ao público de luns a venres, de 9:00 a 14.00 h. 

Esta atención personalizada aos contribuíntes foi solicitada polo Concello ao Catastro e ao ORAL á vista das numerosas demandas de aclaración que chegan ás dependencias municipais e a través da “app” “O Porriño Informa”. 

Hai que ter en conta que nada menos que 17.400 parcelas -dende a última revisión de valores que data de 1985- pasan a ter consideración de chan urbano e, polo tanto, pasan do padrón de rústico ao de urbana. Esta revisión tamén terá como referencia os valores catastrais de 1985 aos efectos dos recibos do IBI.