Un acusado de elaborar pornografía infantil con menores é condenado a 118 anos de cárcere.

Contactaba a traves de Omegle, Facebook e Skype, contaba con material de mais de 850 horas en video sobre actitudes sexuais dos menores.

A sección sexta da Audiencia Provincial da Coruña condenou a 118 anos de cárcere, dos cales, tal e como establece a lexislación vixente, o cumprimento máximo efectivo será de vinte anos, a un residente no partido xudicial de Padrón que elaborou diverso material pornográfico no que interviñan menores. En concreto, foi condenado como autor dun delito de difusión de pornografía infantil; doce delitos de elaboración de pornografía infantil; nove delitos de abusos sexuais; e un delito de agresión sexual. Ademais das penas de prisión, o tribunal impúxolle dez anos de liberdade vixiada e todos os delitos levan consigo a pena de inhabilitación especial para calquera oficio ou profesión que conleve contacto regular e directo con menores de idade por un tempo superior en catro anos ao da pena de privación de liberdade imposta para cada delito.

Para elaborar o material pornográfico, segundo consta na sentenza, contactou previamente coas vítimas a través de Omegle, Facebook e Skype, ben directamente, ou noutras ocasións, facéndose pasar por unha menor. “Valéndose deste engano, ou actuando co seu propio perfil, o procesado obtivo a confianza dos menores e instounos a que mantivesen comportamentos de natureza sexual diante da cámara web do ordenador”, indican os maxistrados, quen asegura que os menores, nalgunhas ocasións, accederon a esas solicitudes “ante o temor de que o acusado revelase aos seus proxenitores as actitudes mantidas”. O condenado, ademais, aproveitou as videochamadas que mantiña cos menores “para gravalos mentres realizaban prácticas sexuais, sen que estes fosen coñecedores de tal circunstancia”. O investigado, ademais, entre xaneiro de 2013 e abril de 2016, utilizando diferentes tipos de material informático e de almacenamento dixital que tiña no seu domicilio e valéndose de diversas aplicacións informáticas almacenou no seu ordenador máis de 850 horas de vídeo que contiñan imaxes e gravacións nas que menores de idade tiñan comportamentos de carácter sexual.

O tribunal destaca que o procesado, “a sabendas de que atentaba contra a indemnidade sexual dos menores”, compartiu e facilitou a terceiros, polo menos, 3.500 arquivos deste material, no que se vía a menores de 16 anos sendo vítimas de violencia sexual. “Nas referidas imaxes aparecían menores coas mans atadas con cordas e correas, amordazados, sendo en ocasións mesmo penetrados oral, anal e vaxinalmente e sendo obxecto de prácticas zoófilas, chegando con tales condutas para poñer en perigo a súa integridade física”, describen os maxistrados.