Estas axudas destínanse a autónomos, Pemes e micro empresas do Porriño afectadas pola crise sanitaria cun tope de 1.200 € por solicitante

 

Un total de 78 solicitudes presentáronse para acceder as axudas que prestará o Concello para autónomos, pequenas e medianas empresas e micro empresas do Porriño afectadas pola crise derivada da pandemia sanitaria. O prazo de presentación de solicitudes comezou o martes 29 de setembro e rematou onte martes 20 de outubro, segundo informou a Alcaldía.

O Servizo de Intervención do Concello estudará de inmediato cada petición e revisará a documentación, requirindo a que puidera faltar no prazo de 10 días que se comunicará aos interesados.

Unha vez rematado o proceso de revisión, será a comisión técnica a que resolverá a concesión das axudas económicas que, para cada caso, ten un tope de 1.200 € por peticionario.

Estas axudas a autónomos, pemes e micro empresas realízanse con cargo a un fondo de 100.000 €, segundo acordo da corporación municipal.