As instalación municipais de tenis en Areas, Tui, contan agora con tres pistas dobres

Esta mañá tivo lugar a reapertura oficial das instalacións tras as obras realizadas

 

 

Está mañá tivo lugar a reapertura oficial das pistas municipais de Tenis situadas en Areas tras as obras de remodelación realizadas, que supuxeron un investimento de 53.095,22€ con cargo ao Plan Concellos.

 

O alcalde de Tui, Enrique Cabaleiro, destacou que con esta actuación dáse cumprimento a unha vella demanda do Club Tenis Tui en canto á mellora das instalacións. Avanzou tamén que o gran reto de cara ao futuro é a execución dunha área multideporte nun emprazamento axeitado.

 

O concelleiro de Deportes, Rafael Estévez, destacou a actuación realizada nestas pistas empregadas polo Club Tenis que desenvolve a súa actividade dende 2012 e que conta na actualidade con 60 deportistas federados. Referiuse amais as obras que se están a executar tamén nos pavillóns municipais, no centro municipal de Remo, ou no Campo de Fútbol Álvarez Durán, dentro do obxectivo xeral de reformar as instalacións deportivas municipais.

 

O presidente do Club Tenis Tui, Pablo García, agradeceu a intervención realizada destacando as características das pistas das que dicía “teñen un bote perfecto”, e engadindo que son “o acicate que nos faltaba”. Ao tempo convidou a practicar esta disciplina deportiva.

 

A actuación realizada consistiu na ampliación das instalacións co que se pasa a contar con tres pistas dobres, que foron pintadas en resina especial deportiva de 5 capas. Para posibilitar a ampliación foi preciso o traslado dos báculos de iluminación, e está previsto o cambio das luminarias a tecnoloxía led. Amais foi colocado un novo valado perimetral, e reubicouse a caseta destinada a vestiarios. Nun futuro próximo está prevista a colocación dun novo módulo para ser empregado coma oficina e almacén.