A Consellería de Benestar Social convida a veciñanza a aproveitar os recursos naturais

 

 

A oficina municipal de voluntariado, dependente da concellería de Benestar Social, Igualdade e Mocidade, convida a toda a veciñanza a participar na “Operación Carballo” que terá lugar este sábado día 15 de novembro ás 10 horas na casa cultural de Arcos.

Verónica Carrera, concelleira de Benestar Social, informa desta actividade que se desenvolve en colaboración coa Consellería de Política Social e coa comunidade de montes de Arcos, na que se recollerán todos os pequenos carballos que terán que ser eliminados na primavera para dar cumprimento á normativa de xestión dos montes. Estes carballiños serán trasplantados a bricks ou outros recipientes para que logo sexan prantados pola veciñanza nas súas propiedades ou nos montes afectados polos incendios, entre outros emprazamentos.

Todos os interesados e interesadas en participar deberán levar luvas e bricks para trasplantar os carballos. Máis información e confirmación de asistencia no enderezo electrónico voluntariado@ponteareas.gal ou no número de teléfono 687 764 516.

“O obxectivo é aproveitar os recursos naturais e propagar as especies autóctonas  polos nosos montes e propiedades, ademais de polas en valor, motivo polo que se transplantarán pequenos carballos do monte a maceteiros reciclados como os bricks para que cada voluntaria e voluntario poida darlle un novo fogar”.