Este sábado o público poderá saborear esta sobremesa e gozar das actuacións musicais previstas nesta xornada organizada pola Asociación San Telmo, coa colaboración do Concello de Tui

Dende as 17.00 h deste sábado, 26 de novembro, a praza de San Fernando (en caso de choiva no cárcere vello, na rúa Sanz) acolle a celebración da II Xornada de Degustación de Boleardos, organizada pola Asociación Cultural, Deportiva, Recreativa e Xuvenil San Telmo de Tui e coa colaboración do Concello de Tui.

As persoas que se acheguen a esta actividade poderán degustar esta sobremesa tradicional de Tui da que a asociación San Telmo garda a receita coma ouro en pano tras recuperala grazas a colaboración de distintas persoas maiores de Tui que lles transmitiron os ingredientes e a elaboración no ano 2014. Precisamente entre as peculiaridades da receita está o uso da fariña de millo pego e de trigo callobre.

No ano 2016 realizaron xa unha primeira degustación de boleardos que se repite este sábado, coa colaboración da panadería Xulio para elaborar preto de 300 unidades desta sobremesa. Tamén estarán á venda en bolsiñas de tres unidades. Non faltará nesta xornada a música tradicional con diferentes actuacións. A primeira delas será a do grupo de baile e pandeireta infantil, Alfándega. Seguidamente, terá lugar a presentación do grupo da asociación Queixumes do Aloia.

Finalmente, actuarán os Carrapucheiros e Ferriñas Bravas de O Fiadeiro. Tamén se proxectará un vídeo, elaborado pola asociación, no que se recolle todo o proceso dende a plantación do millo até a elaboración dos boleardos.