O Concello do Porriño arrendou dúas parcelas que está a acondicionar como aparcadoiro de máis de 9.000 m² nunha zona estratéxica

O Concello do Porriño formalizou o arrendamento de dúas parcelas que suman unha superficie total de máis de 9.000 m², nas que se habilitará unha nova zona de aparcamento gratuíto no centro urbano.

Trátase de dous solares ubicados fronte ao instituto Pino Manso, un de 6.500 m² que linda co acceso á Risca e a rúa Antonio Palacios e pola mesma rúa lindando co colexio Hermanos Quiroga, outro de 2.650 m².

A estratéxica localización do mesmo dará servizo a numerosos usuarios pola proximidade de catro centros de ensino –Colexio Hermanos Quiroga, IES Pino Manso, CEIP Xosé Fernández López e Galiña Azul-, o Polideportivo Municipal ou o Centro de Saúde; resolvendo á súa vez as paradas dos vehículos nas beirarúas, que ao longo dos anos se levan feito ás horas de entrada e saída do alumnado ou dos usuarios das instalacións deportivas.

Este aparcamento municipal gratuíto súmase a outros dous habilitados na rúa Leandro Diz e o do Roxy.