Tras o éxito do I Festival Internacional de Artes de Rúa a organización comeza xa a preparar a edición de 2022

A maxia de distinta disciplinas artistas conquistou a pasada fin de semana a Eurocidade Tui-Valença co I Festival de Artes de Rúa, co que se tendeu unha nova ponte cultural entre ambos municipio.

Trátase dun evento único pola súa singularidade ao celebrarse simultáneamente en dúas cidades de dous países. Trátase do primeiro evento organizado conxunta e directamente polo Concello de Tui e pola Cámara de Valença, institucións públicas con distinto marco legal, formas distintas de traballar e distintos protocolos,… diferenzas que se souberon superar, e incluso converter en fortaleza e un punto máis de encontro dous pobos que dende hai séculos manteñen unha estreita relación.

O Festival de Artes de Rúa forma parte do proxecto Unicidade, co-financiado polo programa Interreg V-A, Espanha-Portugal, 2014-2020. Grazas a estes fondos europeos foi posible  por en marcha un evento, nunhas circunstancias complicadas, coma é esta época de pandemia na que nos atopamos, e superar esas dificultades para convertelas en fortalezas de cara a vindeiras edicións.

Rúas e prazas foron o escenario para diversos artistas de teatro, clown, música… que atoparon a complicidade do público nos seus espectáculos.

Finalmente desenvolvéronse 22 funcións, xa dúas tiveron que se suspendidas, as que se celebraron no Jardim das Amoreiras e no Largo do Governo Municipal na Fortaleza de Valença, e no Paseo da Corredoira, o Paseo Fluvial e a Praza da Misericordia en Tui. Tamén o auditorio da Escola Superior de Ciencias Empresariais de Valença xunto ao Teatro Municipal e o pavillón do IES San Paio en Tui acolleron os espectáculos que foi preciso trasladar debido á choiva. O festival contou cun protocolo covid nunha aposta pola cultura segura.

O público familiar foi o gran destinatario da programación prevista nun festival que aúnou distintas artes escénicas. Mamá Cabra e A Gramola Gominola ofreceron os concertos de maior capacidade, mentres a música de Farra Fanfarra e BrassDass soou por rúas e prazas.

Antón Choucheiro, Pajarito, Clown Enano, David Gonçalves, Arsenio Baruffi, Fredi&Cia, e Circo Chosco mesturaron nos seus espectáculo teatro, acrobacias, malabares, … enchendo de animación a fin de semana na Eurocidade.

 O Concello de Tui e a Cámara de Valença destacan amais a colaboración prestada para o desenvolvemento ás persoas que colaboraron coma voluntarios en Valença, ao grupo Scouts Alhoia e a Protección Civil de Tui. O esforzo do persoal municipal de ambos concellos e a empresa encargada da produción xunto a boa resposta do público permiten realizar un balance satisfactorio do evento.

Este Festival é o primeiro proxecto que no marco da Eurocidade supón a organización conxunta e directa por parte do Concello de Tui e da Cámara de Valença. Un festival co que suman un atractivo máis a este territorio transfronteirizo, no que se une o patrimonio, a cultura, a natureza e a historia.

A concelleira de Cultura de Tui, Sonsoles Vicente, destaca a nova ponte tendida entre ambos municipios a través desta primeira experiencia organizada conxuntamente.  O vereador de Cultura de Valença, Mario Rui Oliveira, incide nesta unión do territorio a través das artes de rúa, entre dous pobos que comparten unha historia e unha cultura común. Esta primeira edición senta as bases para afianzar o festival nos vindeiros, e traballar en novos proxectos conxuntos coma Eurocidade.

Tras pechar exitosamente esta primeira edición Tui e Valença comezan xa a traballar no II Festival Internacional de Artes de Rúa para 2022.