Desde onte e até domingo, celebraránse tres xornadas de música ao vivo na Illa de San Simón, cun cartel segredo liderado por artistas femininas e coa vangarda, a sustentabilidade e a natureza como eixos da programación.

O Festival Sinsal Son Estrella Galicia desenvolve desde mañá e ata o domingo unha nova edición na Illa de San Simón, bautizada como “esencial” e que ten como eixos da súa programación a vangarda, a sustentabilidade e a natureza. A Xunta de Galicia volve patrocinar o evento como unha das 13 citas adheridas á súa marca FEST Galicia, vinculada así mesmo á celebración do Xacobeo 21-22.

Trátase dunha das principais vías de apoio autonómico aos encontros profesionais de música, para os que se conta cun orzamento de 840.000 euros en 2021. De feito, FEST Galicia incrementou os seus fondos nun 25%, chegando aos 500.000 euros, e este ano retomouse, ademais, a convocatoria específica de subvencións a festivais de música, suspendida en 2020 ante a imposibilidade de levar a cabo os eventos nos seus formatos habituais. Esta liña de axudas, actualmente en proceso de tramitación, distribuirá outros 340.000 euros entre os encontros beneficiarios.

No caso do Festival Sinsal, o cartel segredo segue sendo un dos seus sinais de identidade, aínda que desta volta a organización desvelou que os grupos proceden de distintos puntos de Galicia e do resto de España, Portugal e Estados Unidos, así como que o 70% deles están liderados por mulleres ou compostos na súa totalidade por integrantes femininas.

O escenario FEST Galicia Xacobeo 21-22 é un dos dous instalados na Illa de San Simón, aos que neste Sinsal Esencial se suma, ademais, un escenario virtual da man do colectivo Liveforevr. Esta proposta innovadora suporá a retransmisión aberta a todo o mundo dunha experiencia inmersiva, en colaboración cunha das artistas do festival, o sábado 24 a través do Twitch e do Instagram de Liveforevr e Sinsal.

Coas entradas xa esgotadas, as tres xornadas de programación incluirán catro concertos, unha conversa sobre o futuro sostible da industria cultural e unha sesión de DJ para animar a despedida. Ademais, polas tardes os asistentes poderán coñecer de preto a memoria e a natureza que se atopa no arquipélago conformado por San Simón e San Antón.

No marco das actividades paralelas, poderase ver por vez primeira un pequeno avance da nova curta documental da cineasta redondelá Diana Toucedo sobre o traballo das mulleres e homes do mar da ría de Vigo.