Os barrios nos que se realizan estas actuacións son os de Ermitas, Couto, Toucedo e tamén en Alxén, cun orzamento de 72.319,92 € con cargo ao Plan Concellos 2020 da Deputación

 

  

O Concello de Salvaterra de Miño segue coas obras de ampliación da rede de saneamento municipal, e nesa liña  ven  de iniciar as obras  nos barrios de Ermitas e Couto, na parroquia de Salvaterra, e no barrio de Toucedo na parroquia de Alxén, con cargo o Plan Concellos 2020.

As actuacións que se están realizando consisten na  limpeza, corte e demolición de firme, complementando a rede de servizos existentes mediante a execución da rede de saneamento na zona e a reposición das gabias.

As tres actuacións executadas nos barrios de Salvaterra e Alxén teñen como fin último dotar de saneamento ás vivendas que non posúen dito servizo, para que se poidan conducir as augas residuais ao colector xeral para o seu posterior tratamento. A obra consiste na canalización de tuberías de PVC destinadas á rede de saneamento incluíndo todas as actuacións complementarias: escavacións,  pozos de rexistros nos puntos necesarios da nova rede e reposicións.

En total está previsto executar 782 m de tubería de PVC de 250 mm de diámetro nominal e a instalación de 20 pozos de rexistro nos puntos necesarios do novo colector. Os tramos a executar fluirán en colectores existentes, polo que as vivendas poderán conectarse á rede de saneamento actual unha vez rematada a obra, cun prazo de execución de 2 meses.

O orzamento desta obra ascende á cantidade de 72.319,92 €, que levará a cabo O Concello a través do Plan Concellos 2020 da Deputación de Pontevedra.