Estas subvencións municipais están dirixidas a aquelas comunidades de augas porriñesas aptas para o consumo

 

 

O Concello do Porriño informa de que xa está aberto o prazo para presentar as solicitudes para beneficiarse das subvencións municipais ás Comunidades de Auga potable, que este ano 2021 teñen un importe total de 95.000 €.

A convocatoria publicouse, o pasado martes día 2, no Boletín Oficial da Provincia (BOPPO) entrando en vigor a partir do día seguinte e, polo tanto, por un período de dous meses.

A convocatoria, a través da Concellería de Infraestruturas e Urbanismo que dirixe Pedro Pereira, ten por obxecto apoiar e promover, en réxime de concorrencia competitiva, a concesión de subvencións entre as comunidades de usuarios de augas de consumo do Porriño que reúnan os requisitos establecidos nas bases.

O obxecto das axudas comprenderá a contratación de obras de reparación, substitución de redes de distribución cando non superen os 20 m, así como os gastos correspondentes a analíticas de control sanitario e os gastos de mantemento e conservación en captación de augas, sistemas de almacenamento e potabilización e mantemento das instalacións.

Para estas axudasestableceuse un importe máximo de 8.000 € por asociación.

No ano 2020 repartíronse un total 59.976 € nas achegas municipais que acadaron dez comunidades solicitantes, conforme a resolución final da comisión de avaliación que presidiu o concelleiro de Infraestruturas, Pedro Pereira asistido por tres técnicos municipais.