A alcaldesa do Porriño, Eva García sostén que a presión do Partido Socialista obriga á Consellería de Sanidade “por fin a mover ficha en relación co proxecto de ampliación do Centro de Saúde”

 

Tan só horas despois da comparecencia da alcaldesa xunto coa deputada Leticia Gallego para denunciar o reiterado incumprimento do compromiso adquirido por esa Consellería, trasladado ao Parlamento de Galicia, esta mañá chegou por rexistro unha solicitude de licenza de obras presentada por ese departamento autonómico.

A solicitude sinala que a licenza é para a ampliación e reforma do Centro de Saúde e apunta como orzamento estimado da obra, 2.916.716 €.

Para xustificar a solicitude, a Consellería de Sanidad indica que estaría prevista “para data próxima o anuncio para a contratación da obra”, segundo a petición.

A alcaldesa do Porriño valorou que “volve a resultar lamentable a falla de compromiso do PP local con esta demanda da ampliación do Centro de  Saúde namentres malgastan o seu tempo en facer labor de oposición a través dos xulgados”, manifestou Eva García.