Autocine, actuacións con aforo limitado, xogos Playmobil e os callos forman parte do programa dunhas festas condicionadas polo Covid

Na 27 edición da Festa dos Callos participarán unha vintena de locais e o custe da tapa será de 6 €

 

 

O Porriño vai ter Festas do Cristo neste 2020 “pero serán completamente diferentes cun formato reducido pola obriga de observar os protocolos anti-covid e de coidar da nosa seguridade”, manifestou hoxe Eva García de la Torre coa ocasión da presentar o programa festivo.

No acto de presentación celebrado na praza Arquitecto Antonio Palacios, diante da Casa do Concello, Eva García avogou por “un comportamento responsable da veciñanza porriñesa á hora de gozar destas Festas do Cristo”. “Entendo que os nosos veciños e veciñas van seguir sendo exemplares nos coidados e nas medidas de seguridade e protección”, manifestou.

Cami Moreira, concelleira de Cultura, responsable da organización destas Festas indicou que “neste ano, todas as actuacións serán en recintos reducidos, con aforos limitados e cadeiras”; deste xeito contarase con 100 cadeiras nas prazas de Antonio Palacios e do Cristo, con 75 no Centro Cultural Municipal e quendas de 20 nenos para a zona de xogos.

 A concelleira subliñou que entre as novidades desta edición “un auto cine que habilitaremos no aparcadoiro Karting, en Torneiros, fronte a “Maderas Iglesias”, onde proxectaremos as curtas gañadoras no recente Festival de Cans”, indicou Cami Moreira. Para manter o control e a seguridade, as persoas que desexen acudir cos seus vehículos deberán inscribirse previamente a través do enderezo electrónico cultura@oporrino.org

Nesta edición das Festas do Cristo sí haberá Festa dos Callos que terá lugar o domingo 4 de outubro con animación de rúa a cargo da “Agrupación Feixoada”. Será a edición número 27 “aínda que coas limitacións esixibles polos protocolos anti-Covid e centrada nos establecementos da hostalaría local”, segundo explicou Moreira Fontán.

Este ano por motivos do aforo establecido nos locais, dende a Asociación de Hostaleiros do Porriño -AHOSPOR-, tras a reunión onte pola tarde dunha veintena de asociados participantes, acordaron que o prezo da tapa de callos coa sua peza e pan será de 6 €; así mesmo recoméndase, pola limitación de aforo e medidas protocolarias establecidas, a recollida dos callos en tarteiras ou tuppers.