Dende o día 20 a 30 de novembro a carpa dos Bolechas estará instalada na praza da Música con diferentes actividades da man das Concellerías de Cultura e Benestar Social

 

As concellerías de Cultura e Benestar Social dirixidas por Hortensia Bautista e Verónica Carrera, respectivamente, convidan a todos os cativos e cativas de Ponteareas a desfrutar das actividades que os Bolechas ofrecerán na carpa da praza da Música.

En colaboración coa Deputación de Pontevedra, a exposición “Gatiños, Ghatiñas, Gatíos” estará dende o día 20 ao 30 de novembro instalada baixo unha carpa nesta céntrica praza enriba do auditorio municipal. Todas as tardes os e as que o desexen poden visitar a carpa para xogar coas actividades propostas.

As concelleiras visitaron o CEIP Fermín Bouza Brey para presentar esta actividade e agasallarlle ao alumando de primeiro de primaria o conto “Os Bolechas visitan Ponteareas” que tamén será repartido entre alumnado de diferentes cursos.

Na visita aproveitaron para convidalos á inauguración que terá lugar o vindeiro día 20 ás 11:30 h no auditorio municipal no que Os Bolechas sorprenderán ao alumnado coas súas divertidas ideas. O deputado provincial de Cultura Xosé Leal será o encargado da apertura desta actividade na que participarán centros educativos de distintos concellos da comarca do Condado.