A área sanitaria de Vigo conta cun novo laboratorio de microbioloxía para o sistema ‘Pooling’ de cribado da COVID-19

Ratio: 0 / 5

Inicio desactivadoInicio desactivadoInicio desactivadoInicio desactivadoInicio desactivado
 

Esta semana remataron as obras de ampliación da estrutura, co obxecto de integrar nunha mesma sala todo o equipamento robótico

 

A Área Sanitaria de Vigo vén de poñer en funcionamento o novo laboratorio de Microbioloxía, a través do Instituto de Investigación Sanitaria Galicia Sur, para o sistema do procesamento agrupado de mostras-Pooling no cribado da Covid-19.

O presidente da Xunta, Alberto Nuñez Feijóo, acompañado polo conselleiro de Sanidade, Julio García Comesaña, realizou hoxe unha visita ás novas instalacións e mantivo unha xuntanza cos responsables deste proxecto para coñecer a capacidade diagnóstica actual da nova estrutura e as súas potencialidades. 

Neste encontro estiveron presentes o xerente da Área Sanitaria de Vigo, Javier Puente; a directora da Fundación Sanitaria Galicia Sur, Beatriz Gil de Araújo; o enxeñeiro da Escola Superior de Enxeñaría de Vigo e ideólogo do proxecto, Jacobo Porteiro; e o xefe de Microbioloxía, Benito Regueiro, xunto con outros microbiólogos do servizo.

O actual laboratorio do sistema Pooling, cuxas obras remataron esta semana, permite integrar nun único dispositivo todos os equipos robóticos deste procedemento, xa que ata agora o módulo preanalítico estaba situado nunha sala diferente, o que dificultaba o proceso. Por outra banda, o novo laboratorio foi emprazado nun lugar de maior accesibilidade, o que facilitará e mellorará a entrada das mostras para procesar.

Este sistema está conformado por diferentes equipamentos: un módulo preanalítico que destapona, clasifica e rexistra a entrada da mostra, e garante que cumpra as condicións para analizar; 2 robots pipeteadores que actualmente agrupan 20 mostras nun mesmo tubo –un deles doado pola Fundación Amancio Ortega-; 2 equipos de extracción que preparan a mostra e realizan a PCR; e 3 módulos termocicladores que ofrecen o resultado final do pool.

A xerencia da Área Sanitaria de Vigo puxo en marcha, no pasado mes de maio e por primeira vez en España, a técnica pooling, que permite analizar nun único test as mostras de varios cidadáns –agora realízase cunha vintena-, multiplicando a súa capacidade de avaliación.

Consiste en agrupar as mostras de 20 persoas diferentes e procesalas xuntas, como se fosen as dun só individuo. Se o resultado do procesamento da mostra resultante é negativo, infírese que cada unha das mostras orixinais son tamén negativas, co que se aforraría o tempo e capacidade que conlevaría o estudo individual de cada unha das mostras orixinais.

Se pola contra o resultado global é positivo, téñense que separar as mostras para volvelas procesar: ou dividindo a mostra conxunta en fraccións máis pequenas ou analizando cada unha delas de xeito individual.

Este sistema é unha ferramenta diagnóstica de gran eficiencia que permite vixiar e controlar a circulación do virus en áreas estratéxicas. Isto é, en vez de esperar a que aparezan traballadores con síntomas, realízase unha acción proactiva de busca e identificación daqueles asintomáticos, para controlar o antes posible a aparición de brotes da enfermidade e garantir áreas estratéxicas libres de virus circulante.

Polo tanto, resulta moi eficaz para testar grupos de persoas en grandes centros de traballo, como persoal sanitario, usuarios e traballadores das residencias sociosanitarias, así como colectivos das áreas industriais.

O Procesamento agrupado de mostras-Pooling iniciouse xa hai catro meses cos profesionais dalgunha das áreas máis críticas do hospital Álvaro Cunqueiro, e hoxe en día xa está implantado en Coidados Intensivos, Urxencias, Hematoloxía e Unidades de Hospitalización Covid. Así, este persoal, xunto cos usuarios e traballadores das residencias sociosanitarias, é testado periodicamente e de xeito secuencial.

No pasado mes de agosto, este sistema iniciouse tamén co persoal dos centros de saúde, comezando polo de Val Miñor, e de xeito paralelo con traballadores doutras institucións, como a Autoridade Portuaria, e de sectores económicos clave, como a automoción ou o metal.

Aínda que inicialmente a mostra recollida para analizar era unha mostra nasofarínxea, no momento actual é unha mostra de saliva. O método de recollida é a autotoma (autorrecollida da saliva). Ademais, o persoal conta tamén cun autorrexistro, unha aplicación móbil cunha identificación unívoca que, a través dun código, rexistra cada vez que o profesional se realiza a mostra. Os resultados das análises PCR xa aparecen nesa aplicación, de xeito que o autorrexistro elimina moitos trámites

Coa estrutura actual, este laboratorio ten capacidade para procesar 100.000 mostras mensuais. Nesta actividade priorízase o cribado quincenal dos preto de 7.000 traballadores da Área Sanitaria de Vigo (14.000 ao mes) e o cribado quincenal dos 15.000 traballadores das residencias sociosanitarias de Galicia (30.000 ao mes). E o resto (56.000) utilizarse no cribado dos colectivos dos sectores industriais.

Escribir un comentario
PorriñoDigital. es recuerda: Será declinada toda responsabilidad derivada de las afirmaciones realizadas por sus usuarios. La sola publicación de comentarios en las noticias implica la aceptación de esta condición. Se ruega moderen el tono de sus afirmaciones en aras a mantener un talante dialogante y educado.


PorriñoDigital.es nace como un proyecto de jóvenes emprendedores porriñeses con ganas de dotar a nuestra villa de un espacio de comunicación local.
Tú eres parte de nuestro proyecto, trabajamos para tí.

Secciones

Redes Sociales

Suscríbete