A modernidade da música galega entra nunha canteira en restauración no Porriño

Ratio: 0 / 5

Inicio desactivadoInicio desactivadoInicio desactivadoInicio desactivadoInicio desactivado
 

A modernidade da música galega entra nunha canteira en restauración no Porriño

O Festival Sons da Canteira celebra a súa primeira edición o 29 de agosto en Vilafría. Baiuca, Mercedes Peón, Laura Lamontagne & PicoAmperio e DJ/VJ Juanma Lodo unen a tradición galega coa vangarda electrónica. No sorprendente escenario de pedra proxectaranse videocreacións.

Sons da Canteira é un festival de música galega organizado polo Concello do Porriño que se celebra o 29 de agosto na canteira en proceso de restauración de Vilafría. Arrinca a súa primeira edición cun cartaz de catro artistas galegos da música e da videocreación nunha contorna de grande valor, coa motivación da recuperación do territorio.

Actúan Baiuca, Mercedes Peón, Laura Lamontagne & PicoAmperio e, abrindo o concerto, DJ/VJ Juanma Lodo. Todos eles proxectos moi persoais que achegan dalgún xeito a tradición galega á vangarda e á electrónica. A muralla de pedra serve de singular escenario e sobre ela empregarase videomapping para que os grupos emitan as súas proxeccións.

O Sons da Canteira establece estritos protocolos de seguridade para un aforo de 500 persoas. Ao realizar a compra escóllese cadeira ou mesa (até esgotar prazas). O público pode xantar mentres goza do espectáculo grazas a dúas food trucks. Os espectadores en mesa seleccionan menú con app móvil e reciben a consumición no sitio. Os de butaca piden na barra respectando a distancia de seguridade. O festival conta con persoal dedicado en exclusiva á limpeza e xestión de residuos.

AUTOBÚS GRATUÍTO COA ENTRADA E DESCONTOS PARA GRUPOS

As entradas saen á venda este mércores en www.woutick.es. O prezo oscila entre os 16,50 euros da individual, 13,75 ao mercar dúas, 12,38 se son catro e 11,92 para seis. Coa entrada vai incluído o bus desde a Avenida de Galicia do Porriño.

Baiuca

Folk electrónico e material audiovisual. Cunchas, frautas ou gaitas mestúranse con programacións, sintetizadores e voces tradicionais, cun abano de resultados, de territorios inesperados que entran no pop ou no industrial, abertos á exploración sonora. Baiuca transformouse nun dos referentes internacionais da música galega no 2019, mais detrás hai unha longa traxectoria, o proxecto previo do músico Alex Casanova (nacido en A Baiuca, Catoira) e o seu elegante pop electrónico. 

O concerto de Baiuca é o encargado de pechar o festival Sons  da Canteira. Acompáñase dun potente material audiovisual, músicos e voces nun repaso pola súa discografía entre Solpor (Raso, 2018), Misturas (Raso, 2019) e outros traballos de renovación da música tradicional galega.

Mercedes Peón

Pola súa traxectoria é a máis internacional e vangardista de todas as músicas galegas. Estivo presente en Estados Unidos, Chipre, Dinamarca, Nova Zelanda, Australia e en case toda Europa. Leva anos a renovar a música tradicional galega, enchéndoa de matices. Comezou cun profundo estudo de campo da tradición oral nas aldeas e na súa discografía presenta sons recollidos das súas investigacións. Fixo divulgación de todo o folclore vivo de Galicia a través do programa Luar, da Televisión de Galicia. Traballou na docencia, formou parte do grupo folk Xacarandaina, colaborou con Budiño, Os diplomáticos de Monte-Alto, Kepa Junkera, Carlos Núñez ou Mano Negra. 

A súa carreira en solitario comeza con Isué (Resistencia, 2000), despois Ajrú (Discmedi, 2003) ou Sós (Do Fol, 2010). En Déixaas (Altafonte, 2018) a música métese no sociopolítico, tira de sons do estaleiro de Navantia- Ferrol e crea un son rompedor.

Laura Lamontagne e PicoAmperio

Unha das grandes promesas do panorama musical galego é o dúo que fusiona o universo poético e folk de Laura LaMontagne e a experiencia hip-hop de PicoAmperio. Xuntáronse en xuño do 2019 e en menos dun ano deixaron pouso nos ciclos Mubea da Alhambra, Magia Roja ou BAM de Barcelona, San Froilán de Lugo ou Sinsal de San Simón. Tamén acadaron o primeiro posto nas listas demoscópicas de Mondosonoro do mellor do ano 2019.

O dúo aborda campos musicais que oscilan entre a tradición galego-portuguesa, ritmos electrónicos, hip hop e ambientes íntimos provocados pola evolución de superficies de loops musicais. Poesía propia e adaptación de clásicos como Rosalía, Pessoa, Lorca ou Martín Codax.

Juanma LoDo

Artista multimedia, deseñador, produtor, realizador e músico experimental, colaborou co colectivo Proxecto-Ds, fixo fotografía e edición no Dot Galicia Magazine ou en Prendas Públicas, dirixiu documentais e creou pezas de arte audiovisual para teatro ou museos. Destaca na experimentación sonora e visual con todo tipo de instrumentos e aparellos electrónicos. Abre os concertos do Sons da Canteira.

TAMÉN UNHA EXPERIENCIA GASTRONÓMICA NUNHA CONTORNA ESPECTACULAR

A Canteira de Vilafría está a rematar o seu proceso de restauración. O oco creado pola explotación eliminouse mediante un recheo para facilitar a cobertura vexetal e a reforestación da zona. Nesa contorna singular do festival poderase degustar o xantar elaborado nas food trucks: 

La Pavoneta: Especializada en comida sen glute (certificados por Acepa), pavo e opcións veganas. 

La Mariniere: Auténticas crêpes da Bretaña francesa nunha food truck que percorre Galicia. Salgadas, doces e opcións veganas. 

Todo está preparado para afrontar a situación xerada pola COVID-19. E a app de petición da consumición en mesa diminúe a posibilidade  de colas. Potenciarase, ademais, o uso de envases reciclados.

Escribir un comentario
PorriñoDigital. es recuerda: Será declinada toda responsabilidad derivada de las afirmaciones realizadas por sus usuarios. La sola publicación de comentarios en las noticias implica la aceptación de esta condición. Se ruega moderen el tono de sus afirmaciones en aras a mantener un talante dialogante y educado.


PorriñoDigital.es nace como un proyecto de jóvenes emprendedores porriñeses con ganas de dotar a nuestra villa de un espacio de comunicación local.
Tú eres parte de nuestro proyecto, trabajamos para tí.

Secciones

Redes Sociales

Suscríbete